प्रहरीमाथि आक्रमण गर्दै हतियार लुटपाटमा संग्लन दोलखाका घिसिङलाई धरौटीमा छाड्ने आदेश

अगेनो न्यूज ःकात्तिक २४- गत भदौ २४ गतेको जेनजी प्रदर्शनका क्रममा प्रहरीमाथि आक्रमण गर्दै हतियार लुटपाटमा संग्लन दोलखाका गौतम घिसिङलाई धरौटीमा छाड्न अदालतले आदेश दिएको छ । काठमाडौं जिल्ला अदालतका न्यायाधीश तेजबहादुर खड्काको इजलासले तीन जनालाई धरौटी र एक जनालाई सामान्य तारेखमा छाड्ने आदेश दिएको हो । अदालतले दोलखाको शैलुङ गाउँपालिका वडा नम्वर १ का ४८ वर्षीय गौतम घिसिङसँग दुई लाख रुपैयाँ धरौटी लिएर छाड्ने आदेश गरेको हो । त्यस्तै सिन्धुपाल्चोक बलेफी गाउँपालिकाका धिरज थापासँग १ लाख, पाल्पा रम्भा गाउँपालिकाका विवेक बस्नेतसँग ५० हजार रुपैयाँ धरौटी लिएर छाड्ने आदेश भएको छ । घिसिङले बयानमा आफूसहितका आन्दोलनकारीहरूले भीएस निकेतन कलेजको पाँचौँ तलामा पुगेका प्रहरीलाई तल ओरालेर गालीगलौज र धम्की दिँदै पोसाक खोल्न लगाएको र बागमतीमा हाम फाल्न लगाई ढुङ्गामुढा प्रहार गरेर कुटपिट गरेको स्विकार गरेका थिए । घिसिङ बैंकिङ कसुर मुद्दाका फरार अभियुक्त हुन् । उहाँमाथि २०७९ असोज ४ र २०७९ फागुन १०मा बैंकिङ कसुर मुद्दामा प्रहरी वृत्त गौशालामा मुद्दा दर्ता भएको थियो ।