भालुको निगरानीका लागि दोलखाको वैतेश्वरमा सिसी क्यामरा जडान

अगेनो न्यूज ःमंसिर ५- भालुको निगरानीका लागि दोलखाको वैतेश्वर गाउँपालिकाका विभिन्न सामुदायिक वनहरुमासिसी क्यामरा जडान गरिएको छ । पछिल्लो केही दिनदेखि जिल्लाको वैतेश्वर गाउँपालिका र जिरी नगरपालिकामा जंगलीजनावर भालुको आक्रमण बढेपछि गौरीशंकर संरक्षण क्षेत्रको शिवालयको प्राविधिक सहयोग र हनुमन्तेश्वर सवडिभिजन वन कार्यालय जिरीको अगुवाईमा भालुको निगरानीका लागि सिसी क्यामरा जडान गरिएको हनुमन्तेश्वर सवडिभिजन वन कार्यालय दोलखाका प्रमुख दिपक रिमालले जानकारी दिनुभयो । उहाँका अनुसार स्थानीयले वडा नम्वर ३ को कालीढुङगा मावि आसपासमा भालुको माउँ र बच्चा देखिएको भनेपछि उक्त क्षेत्रमा ४ वटा सिसी क्यामरा जडान गरिएको हो । यस अघि जिल्लाको जिरी नगरपालिका वडा नम्वर ७ र ८मा पनि सिसी क्यामरा जडान गरिएको भएपनि सिसी क्यामरामा भालुको उपस्थिति नदेखिएको रिमालले बताउनुभयो । त्यसैगरी जिल्लाको वैतेश्वर गाउँपालिका वडा नम्वर ३ को मुजुवा, पातले,चिलाउने खर्क लगायतका बस्तीहरुमा टुर गस्ती समेत गरिएको छ । दोलखामा भालुको आक्रमणबाट वैतेश्वर गाउँपालिकाका १जनाको मुत्यु भएको छ भने जिरी नगरपालिकाका ४ जना घाईते हुनुभएको छ ।