दोलखाको मैनापोखरीमा रक्तदान कार्यक्रमको आयोजना,३७ पिन्ट रगत संकलन

अगेनो न्यूज ःमंसिर ५-दोलखाको वैतेश्वर गाउँपालिकाको मैनापोखरीमा आज  खुल्ला रक्तदान कार्यक्रम आयोजना गरिएको छ । दोलखाको वैतेश्वर गाउँपालिका वडा नम्वर ५ मैनापोखरीमा रहेको जनसचेतन बचत तथा ऋण सहकारी संस्था,जनमुखी बचत तथा ऋण सहकारी संस्था, नेपाल रेडक्रस सोसाईटी काब्रे उपशाखाको संयुक्त आयोजना र नेपाल रेडक्रस सोसाईटी जिल्ला शाखा दोलखाको प्राविधिक सहयोगमा भएको रक्तदान कार्यक्रममा ३७जनाले रगतदान गर्नु भएको रक्तसञ्चार समिति दोलखाका संयोजक गोकर्णप्रसाद पोखरेलले जानकारी दिनुभयोे । उहाँँका अनुसार कार्यक्रममा २८ जना पुरुष र ९ जना महिला गरी ३७ जनाले रगतदान गर्नुभएको हो । जिल्लामा रगत अभाव हुन नदिनका लागि हरेक महिना कार्यतालिका अनुसारनै रक्तदान कार्यक्रम हुने गरेको छ । नेपाल रेडक्रस सोसाईटी काब्रे उपशाखाका सभापति राजन दाहालको अध्यक्षतामा भएकोे कार्यक्रममा वैतेश्वर गाउँपालिका वडा नम्वर ४ का वडा अध्यक्ष कुमार चौलागाई,जनमुखी बचत तथा ऋण सहकारी संस्थाका अध्यक्ष माधव प्रसाद दाहाल,सचिव लक्ष्मण चौलागाई,जनसचेतन सहकारी संस्थाका कोषाध्यक्ष राजेन्द्रप्रसाद ढुङ्गेल र जनसचेतन सहकारी संस्थाका लेखा अधिकृत नविन्द्र रिमालले मन्तवय व्यक्त गर्नुभएको थियो ।