काभ्रेमा तोडफोड आगजनीमा संलग्न दोलखाका एक सहित पाँच जना पक्राउ

अगेनो न्यूज ःमंसिर २ जेनजी प्रदर्शनका क्रममा काभ्रेपलाञ्चोक जिल्लाका विभिन्न संरचनामा आगजनी, तोडफोड र लुटपाटमा संलग्न दोलखाको जिरीका एक सहित  पाँच जनालाई प्रहरीले पक्राउ गरेको छ । काभ्रेपलाञ्चोकमा विभिन्न सरकारी संरचना, प्रहरी कार्यालय भवन तथा सम्पत्तिमाथि तोडफोड, आगजनी र लुटपाटमा संलग्न दोलखाको एक सहित पाँच जनालाई पक्राउ गरिएको जिल्ला प्रहरी कार्यालयका सूचना अधिकारी प्रहरी नायब उपरीक्षक रविन विष्टले जानकारी दिनुभयो । उहाँँका अनुसार पक्राउ पर्नेमा दोलखाको जिरी नगरपालिका वडा नम्वर १ का २७ वर्षीय भीम तामाङ,धुलिखेल नगरपालिका वडा नम्वर ३ का २१ वर्षीय अजय तामाङ, खानीखोला गाउँपालिका वडा नम्वर १ का २१ वर्षीय विशाल भोलन,बनेपा नगरपालिका वडा नम्वर ३ का २२ वर्षीय रवीन्द्र परियार र वडा नम्वर ८ का १९ वर्षीय अभि सुधाकार रहनु भएको छ । यसअघि जेनजी आन्दोलनका क्रममा जिल्लामा विभिन्न सरकारी तथा निजी भवन र सम्पत्तिमाथि आगजनी, तोडफोड र लुटपाटमा संलग्न थप १२ जनालाई काभ्रेपलाञ्चोक प्रहरीले पक्राउ गरेको थियो । जिल्लाका विभिन्न स्थानमा आगजनी र लुटपाटमा संलग्नविरुद्ध कार्यालयमा परेको उजुरीका आधारमा घटनाको अनुसन्धानसँगै आन्दोलनका क्रममा आपराधिक घटनामा संलग्नको खोजी भइरहेको कार्यालयले जनाएको छ ।