दोलखामा ४४ हेक्टर बढि वनको जग्गा अतिक्रमण,संस्थागत रुपमा नै ४० हेक्टर वन कब्जा

अगेनो न्यूज ःकार्तिक ९– दोलखामा हाल ४४ दशमलव ८४ हेक्टर वनको जग्गा अतिक्रमण भएको पाईएको छ । जिल्लामा सामुदायिक वन कब्जा हुने क्रम नरोकिएको डिभिजन वन कार्यालय दोलखाले जनाएको छ । जिल्लामा निजी घर टहरा निर्माण,सरकारी कार्यालय भवन,बोडिङ स्कुलको भवन निर्माणका लागि समेत वन अतिक्रमण भएको  डिभिजन वन कार्यालय दोलखाका प्रमुख कृष्ण न्यौपानेले जानकारी दिनुभयो । उहाँका अनुसार जिल्लामा वनले ओगटेको १० हजार ७ सय २१ हेक्टर क्षेत्र मध्ये हाल ४४ दशमलव ८४ हेक्टर वनको जग्गा अतिक्रमण भएको छ । प्रमुख न्यौपानेका अनुुसार जिल्लामा ३९ दशमलव २६ हेक्टर वनको जग्गा संस्थगत रुपमानै अतिक्रमण भएको छ भने ५ दशमलव ५८ हेक्टर वनको जग्गा निजी रुपमा अतिक्रमण गरिएको छ । जिल्लामा सबै भन्दा बढि सवडिभिजन वन कार्यालय शैलुङ अन्तरगत २१ दशमलव ५५ हेक्टर सामुदायिक वन अतिक्रमण भएको छ भने सबै भन्दा कम जिल्लाको हनुमन्ते सवडिभिजन वन कार्यालय अन्तरगत निजीगत रुपमा ०दशमलव ७ हेक्टर सामुदायिक वन अतिक्रमण भएको डिभिजन वन कार्यालय दोलखाले जनाएको छ । शैलुङ सवडिभिजन वन कार्यालय अन्तरगत निजीगत रुपमा ० दशमलव ८५ हेक्टर वन अतिक्रमण भएको छ भने संस्थागत रुपमा २० दशमलव ७ हेक्टर सामुदायिक वन अतिक्रमण भएको डिभिजन वन कार्यालय दोलखाको तथ्याङकमा उल्लेख गरिएको छ । त्यसैगरी जिल्लाको हनुमन्ते सवडिभिजन कार्यालय निजी क्षेत्रबाट मात्रै ० दशमलव ७ हेक्टर सामुदायिक वन अतिक्रमण भएको हो । जिल्लाको भीमेश्वर सवडिभिजन वन अन्तरगत निजी अतिक्रमण १ दशमलव ६७ हेक्टर र संस्थागतरुपमा १ दशमलव २६ हेक्टर गरी २ दशमलव ९३ सामुदायिकको जग्गा अतिक्रमण भएको छ । कालिञ्चोक सवडिभिजन अन्तरगत निजी अतिक्रमण १ दशमलव ७१ हेक्ट्रर र संस्थागत रुपमा १४ हेक्टर गरि १५ दशमलव ७१ सामुदायिकको जग्गा अतिक्रमण छ । जिल्लाको मेलुङ सवडिभिजन अन्तरगत निजी अतिक्रमण १दशमलव ६९हेक्टर र संस्थागत २ दशमलव ८९ हेक्टर गरी ४ दशमलव ५५ सामुदायिकको अतिक्रमण भएको हो । जिल्लाका सडक किनारमा जमिन अतिक्रमण घर टहरा निर्माण गरिएका छन् भने जिल्लाका कतिपय स्थानमा वस्तीनै बसी रहेको पाईएको छ ।अतिक्रमण भएका जग्गामा सार्वजनिक संरचना निर्माण,घरटहरा निर्माण,विद्यालय,क्लबका भवन निर्माण गरिएको छन ।